...::ليبيا أول من ..... في كل شيء::..

وصلتني هذه الرسالة عبر البريد الإلكتروني فأحببت أن تشاركوني قرائتها و كل عام و أنتم بخير و رمضان كريم.
أمس كنت نتفرج في ليبيا الرياضية على برنامج
ايقاعات المنتخب الي يقدم فيه بالرأس علي
بعد شوية قال العلامة الرياضي على راي بنور
ان منتخب ليبيا صاحب اسرع ردت فعل في تاريخ الكرة على هدف يدخل مرماه
وجاب هدف كذب للمليون من نص الملعب للزنتاني
حاجة خيالية من متاعات الكابتن ماجد
المهم قلت انا صح ليبيا بلاد صغيرة وماعندناش بطولات لكن بصراحة من قال ليبيا ياتي الجديد
ما كذبش وخود عندك

اكبر عدد من الاهداف ليبيا وعمان 21 -0
ولا وانسحبوا العمانين احتجاجا على ريقولي
على اساس فرقت 21 ولا 22
وعمك بن سويد 9 اهداف مايديرها الا ليبي ولو لعب الريقولي راهو 10 باهي
وبعدين اللاعب الوحيد الي رفع كاس العالم ومولود في بلاد عربية اكيد بتكون ليبيا
ولا بالصدفة طلع جزار اخرى قند زيكو وماردونا ورومانيجا
الجو هذا مايدره الا ليبي

وامسك عندك
اول دوري ممتاز في العالم يوصل عدد فرقه ل31 فريق
اول دوري درجة تانية يوصل فيه عدد الفرق ل47 فريق
اول لاعب عربي يسجل في فريقين فازوا بكاس العالم من هو؟
اكيد ليبي البلاوي هذين تبي ليبين البرنس طارق التايب سجل على الارجنتين والارجواي ومزال البرازيل
حتى اعلى درجة حرارة في التاريخ عندنا في العزيزية 58 درجة مئوية في الظل اخرى
تريتك مش ساهل يا اريستو

باهي امسك عندك
اول كاس افريقيا يشارك فيها محترفين في ليبيا
اول كاس افريقيا على العشب الصناعي في ليبيا
اول كاس يحسم بركلات الترجيح في ليبيا
اول فريق مايخسرش وماياخدش الكاس ليبيا
لا وشنو خشوا عالمحركات أخرى
أول سباق فورملا ون يندار في دولة عربية كان في ليبيا للترفيه عن الجنود الطليان في هذك الوقت
بس ماعندنش بخت يا ايرستو

المهم شد عندك
اول جماهيرية في التاريخ ليبيا
اول نهر صناعي في ليبيا
اول من استعمل الطائرات في الحرب وادخل الدبابة للصحراء في ليبيا
وأول دولة أعتذر منها الإستعمار هي ليبيا
اطول شاطي في المتوسط في ليبيا
اخر مباراة في القرن العشرين والالفية الثانية في ليبيا
اول مباراة في القرن ال21 والالفية الثالثة في ليبيا
طبعا الفقرة ماقبل الاخيرة تخص الشوط الاول من مباراة ليبيا وغانا في دورة النهر في بنغازي والي بعدها تخص الشوط التاني من نفس المبارة
باهي من اول لاعب سجل في الالفية الثالثة اكيد ليبي قلنالكم بلاوي نحنا
جيجو - جهاد المنتصر سجل بعد دقيقتين من دخول سنة 2000 - في رمضان
المهم اكيد طولت عليكم بس نقدر نكتب للصبح اصلا كل جديد وراه ليبي
زي اول ثورة للعبيد دارها ليبي سبارتكوس
واول شخص يدير الزقزاق ويهد على اوربا بالافيال ليبي وهو
هانيبال وقام بمحاصرة روما
شنو نبوا انعد ولا انعد
اول بلاد عربية يزورها بيليه وماردونا وباتيستوتا
التحنيط أول مره اكتشفوه في ليبيا قبل حضارة الفراعنه بألف سنه ..
هذا مش من عندي . هذا كلام ديسكوفري
__________________________
وبعدين آثار أقدم كنيسه كاثولوكية في العالم
موجوده في وادي بالجبل الاخضركنيسة مرقص و سُواح ايطاليا يزوروا في ليبيا كل عام خصيصا لزيارتها
__________________________
وفي آخر مره انكسفت الشمس كان أفضل مكان في العالم للرؤيا الواضحه و المتكاملة كانت ليبيا
و بالذات في منطقه اسمها واو الناموس
اول سوبر ايطالي في افريقيا والدول العربية في ليبيا
اول مرة الارجنتين تلعب في افريقيا في ليبيا
اول مرة تلعب المكسيك في افريقيا في ليبيا
اول مرة تلعب كندا في افريقيا في ليبيا
اول فريق ينسحب من نهائي افريقي من ليبيا
وليبيا اول دولة تعلن الحرب على امريكا في بداية تأسيس الولايات المتحدة

أول رحلة الى مجاهل أفريقيا :
يروي هيرودوت، أن مجموعة من الشباب الليبيين هم أول من أقتحم مجاهل أفريقيا وقد سجل هيرودوت في كتابه رحلة الليبين منذ 2500 سنة الى أفريقيا المشاهدات التي شاهدوها أنذاك.

اول لحن يرتفع في دنيا الموسيقى :
يقول إيثناوس في كتابه (( مائدة الفلاسفة )) أن الناى المصنوع من شجرة اللوتس التي تنمو في ليبيا كان يطلق عليها الناي الليبي، وقد ذكر إيثناوس أن سيرتيس الليبي هو أول من اكتشف فن العزف على الناي.

الزي الليبي :
يذكر العالم (( سمث كاج بيركت )) في كتابه ((ممرات الحضارة )) الذى طبع عام 1965 ، أن اللباس الروماني منقول اي انه اخد عن اللباس اليوناني القديم . وأن اليونانيين نقلوا العباءة أو الجرد عن الليبيين القدماء ، أي الجرد الذى يلبسه الليبيون الأن عمره يناهز 2500 سنة .

النساء الليبيات :
ذكر هيرودوت في كتابه ، أن توب ودرع أثينا قد نقلهم الاغريق عن النساء الليبيات . وهذا الثوب الذي نقله اليونانيون عن الليبيات هو عبارة عن ثوب طويل يلف الجسم ويضم الكتفيين تتمنطق المرأة ببقيته وتلفه حول وسطها .

ليبيا والفلاسفة :
أختلف مؤرخون الفلسفة ، وقد ذكر يوجين في كتابه (( حياة مشاهير الفلاسفة )) . أن الفلسفة نشأت في الشرق وليس في اليونان ، وذكر أن أشهر الفلاسفة القدماء ليبيا يدعى (( أطلس )) وذكر (( ديوجين)) أن محاورات أفلاطون المشهورة كانت اقتباسا من ارستبوس القوريني اللليبي.

الليبيون القدماء والموضة :
يبدو أن شغف الليبين بالموضة قديم قدم التاريخ ، فقد ذكر هيرودوت أن قبيلة ليبية كان أهلها مميزين بقص شعرهم، فقد كانوا يطلقون شعورهم على شكل (عرف الديك) ، وذلك بحلق الرأس ، واطلاق الشعر على وسط الرأس . واخرون يربون شعورههم على الجانب الايمن من الرأس ويحلقون الذى على الجانب الأيسر .

الليبيون والعربات :
يقول هيرودوت . أن الاغريق تعلموا من الليبين جر العربات وهي
طريقة يتقنها الليبيون ويقومون بربط أربعة خيول لتجر عربة واحدة
اول قائد دخل الي بريطانيا واحتلها ليبي (سيتيموس سيفيروس)في العهد الروماني طبعا...
اول ملك يحكم مصر
وهو مش مصري وقلب علي الفراعنة ودخل العربة الي تجرها الخيول هو ليبي(شيشنق)...
اول مكان يطلع منه الشعير ويمشي لاوروبا (طبعا الشعير اصله شمال افريقيا) من ليبيا..
المهم لو قعدت نحكي للصبح مش حتكمل القائمة عشان هكي اللي عنده حاجة زيادة يضيفها ميتحشمش وتذكر ديما أنك من بلد الأوائل " ليبيا الحبيبة " واللي ما جش ليبي

فاته الجو كله

» الإتحاد الأكبر شعبية في ليبيا بشهادة موقع الإتحاد الأفريقي "الكاف" ¤.